Navigation Menu+

يوم من يوميات عائلة سعودية 😊

Posted on فبراير 19, 2022 by in أَدَبٌ وَمُوسِيقَى وَأُغْنِيَاتٌ

تمت زيارة التدوينة: 686 مرات

 

 

 

الو : راكان يا بوي كلمك أخوك سعود لا !

 تدري وينه

لا..  ليش؟!

ما جاء يتغدى على وقته  4 العصر وأدق على جواله أول يدق  والحين مغلق!

والحين جات الساعة 11 الليل ولا أدري عنه ؟!

طيب يمه بشوف لك وأرجع أدق عليك

نورة ..يا نورة ..  نووووورة  

نورة وهند يركضون للأم

نورة : هلا يمه كلمك سعود لا!

وأنت يا هند كلمك لا!

هند: ليش؟  

الأم: ما جاء يتغدى وللحين ما جاء وجواله مغلق!

راكان: يدق

هلا يمه كلمت واحد من زملائه بالعمل يقول حضر اليوم وطلع بس ما طمني!!

الأم : ليششش وش قال ؟

راكان : يقول اليوم تهاوش مع موظف في العمل !!

الأم : ايششش يا ويلي عن وليدي

راكان : يا يمه إن شاء الله ما فيه شيء تطمني

كلمت إبراهيم ، وفهد، وتركي وبنجيك

 الأم: طيب

هند مسرحة وفجأة تقول لأمها :  يمه لا يكون أخوان خطيبته سوو له شيء بعد ما فك خطبته وأختهم مرضت !!

الأم: أقول أنطمي و ليش يسون له شيء!

رجال ما ارتاح بعد الخطبة وفك خطبته هل أفضل يتزوج أختهم وترجع مطلقة ولا ينفصل عنها قبل يرتبط فيها !!

الجرس يدق

جاء راكان ، وفهد ، وإبراهيم

راكان : هلا يمه يحب رأسها ، فهد بعد وإبراهيم

راكان : إن شاء الله خير يمه هدي بالك

فهد : يمه أنت امرأة مؤمنة بالله طمني بالك وكل اللي ربي كاتبه بتشوفينه!

إبراهيم : أنا أظن أنه مشغول وجواله طفت بطاريته !

الأم : الساعة بتجي وحده بالليل يا إبرهيم وماهي عوايد أخوك يتأخر لها الوقت وبكره عند دوم !!

كلموا الشرطة خل يجيبون وليدي و يطمنون قلبي

فهد : يمه يا قلبي إن شاء الله ما فيه شيء هدي بالك

والشرطة ما يستقبلون بلاغ إلا بعد 24 ساعة إن شاء الله بيرجع و بتطمنين عليه وما يحتاج شرطة!

يا رب إنك تحفظ وليدي وطمن قلبي

الجميع آآآآآآمين

 بقوم أصلي ركعتين

الأم تقوم

الجميع يتناقشون غريبة اختفائه المفاجئ شكل فيه شيء؟!!

راكان انطموا أمي لا تسمعكم

إبراهيم : يكلم تركي رحت للمستشفيات أبيك تفر عليها واحد واحد وتسأل وتشوف!

العيال بالدور كل واحد يروح يتطمن على الأم

هند : أمي حزنتني تبكي على سجادتها وتدعي  إن ربي يحفظ سعود ويرجعه سالم

يا رب يرجع سعود ويفرح قلب أمي ويفرحنا

الجميع : آآآآمين

الأم:  ترجع وتجلس على الكنب وكلها خوف وحزن وتناظر الساعة صارت الساعة 4 الفجر وسعود ما بين يا رب إنك تحفظ وليدي

إبراهيم : شغلوا التلفزيون خل نشوف شيء يغمز لخواته

نورة: بعد صمت طويل يمه بقولك شيء ؟!

 تذكرين يوم رحت لعزيمة جارتنا أم أحمد اللي بحارتنا القديمة

الأم : أي

قابلت جارتنا أم عزيز وسألتني عن سعود وقلت لها تخرج وتوظف ، قالت: بعد ما دمر مستقبل ولدي راح عاش حياته!

احترمتها عشانها حرمة كبيرة ولارديت! وما بغيت أقولك  أخاف أم عزيز انتقمت من سعود أعرفها حقودة !!

الأم بعصبية أقول تعرفين تأكلين تبن وتسكتين!!!

 وش سوى سعود لولدها ؟! ولدها اللي كان يجر المشاكل والهوشات ومعروف بالحارة وبكل مكان!! وسعود فزع له يوم طلع من المدرسة وكان يضربونه وركبه سيارته وهم اللي الحقوه وصدموهم وبغى وليدي يموت سبع شهور في غيبوبة بسببه!! زين أن ولدها انشل ولا كان ميت وماخذه عزاه!! وسعود بعد الله اللي أنقذه من الموت وصار الحين هو اللي دمر حياته! أقول اسكتي

راكان : خلاص فكونا من السالفة هذي

فهد : يمه كلمت خويي يشتغل بالاتصالات وقلت له يشوف لي اتصالاته وتتبع شريحته إذا يقدر وقالي بكره إذا داوم بيرد لي إن شاء الله يطمنا

الأم : إن شاء الله

الفجر أذن الأم : يا الله قوموا صلوا

الأم : فجأة بعد ماصلت وخلصت وهي على سجادتها تلتف على عيالها وين تركي ما شفته من اليوم ؟!!

الجميع يضطرب ويسون نفسه  ما سمعوا ومشغولين!!

إبراهيم : يمه أنا مرسله في شغل يخلصه

الأم: شغل مع الفجور !!

أقول عيالي فيهم شيء!!

تركي وسعود فيهم شيء؟!!

إبراهيم: يا يمه والله ما فيهم شيء

والله إن فيهم شيء وأنت تكذب علي !

اللي يكذب على والدينه ربي ما يوفقه!

إبراهيم: والله يا يمه ما كذبت

إبراهيم بتردد وبتلعثم : يوم كلمتي راكان

  راكان كلمني وكنت جالس في الاستراحة وماجد ولد عمي سمع السالفة وقالي والله يا إبراهيم وأنا جاي على حارتنا شفت على الطريق العام حادث سيارة زي سيارة سعود الساعة 4 العصر! وأنا أرسلت تركي للمستشفيات يبحث

والله إنك تكذب عيالي فيهم شيء وشكل صاير عليهم حادث!!

الأم  تنهار وتبكي وتصارخ بأعلى صوت!

عيالها كلهم مجتمعين عليها يهدونها

فجأة صوت

 وش فيكم صوتكم عالي فيكم شيء!!

الجميع يلتفت

سعود واقف بسرواله وفنيلته وشوشته طايرة ويحكها

وعيونه متنفخة من النوم

الجميع سعوووووووووووووووود

سعود ارتاع وشششششش فيكم !!

الجميع وينك؟

سعود : نايم

الجميع : وين

غرفتك فاضية منت نايم فيها!!

نايم في مجلس الرجال استأذنت الساعة 3 ويوم جيت اسمع صوت المكنسة في الغرفة الشغالة تنظفها

ودخلت مجلس الرجال أنتظرها تخلص تنظيف

 ونمت  من التعب  ما حسيت بنفسي لي يومين ما نمت !

وجوالك؟

 سعود : طفى شاحنة

وسيارتك ؟

سعود : مريت نزلتها في الورشة وجيت لموزين

 

 

سعود يقولون في المستوصف يخيطون جبهته

 أمه من العصبية رمته بكأسة الجبنة

أضف تعليقًا :

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.